MANU – naartusunut angajoqqaanullu 6-it tikillugit ukiulinnik meeralinnut.
MANU angajoqqaanut tamanut tulluartuuvoq pissarsiaqarusuttunut, ilisimasaqarnerulerusuttunut, eqqartueqateqarusuttunut namminerlu angajoqqaajussutsimut eqqumaarinnikkusuttunut.
Inuuneq nuannersoq meeqqannut ilaquttannilu sinnattoriviuk? Taava MANU ilinnoortuuvoq! MANU angajoqqaanngornissamut piareersaataavoq ilinnut ataatanngulersumut anaananngulersumulluunniit. Apeqqutaanani meerartaaqqaalernersutit tallimassaanilluunniit meerartaalernersutit, sumiluunniit najugaqaraluaruit avannaani, kujataani, kangiani, kitaaniluunnniit.
MANU ataatsimoortumik isiginneriaaseqarluni ingerlatsiviuvoq, angajoqqaajussusermi ingerlaarfimmi pissanganartumi pingaarutilimmilu angalaaqatiginniffiusoq. Naartuleqqaarnermiit, ulluinnarisami meeqqap 6-inik ukioqalernissaata tungaanut.
Politikikkut aalajangerneqarnikuuvoq MANU angajoqqaanut nuna tamakkerlugu neqeroorutigineqassasoq. MANU-mi atortussiat suliarineqarsimasut tassaapput: Angajoqqaanngornissamut piareersarneq, Meeraq 1-2-inik ukiulik, Meeraq 3-4-inik ukiulik, Meeraq 5-6-inik ukiulik, MANUMINA meeqqanut angajoqqaanullu atuakkat, MANU Hash, MANU imigassaq, MANU Angajoqqaanik ataatsimiisitsineq, MANU Innuttaasunik ataatsimiisitsineq aammattaaq MANU aanaa aataakkunnut.
Angajoqqaanngortussat illoqarfinni ataasiakkaani angajoqqaanngornissamut piareersarnermut neqeroorfigineqartarput. Taassuma saniatigut uani nittartakkami sakkussat MANU-minngaanneersut nanisinnaavatit.
Meeqqat siunissaraagut – illit meeqqat siunissaraarput
Meeqqat siunissaraagut – illit meeqqat siunissaraarput
Ataata anaanalu tamarmik qitiupput
Ataata anaanalu tamarmik qitiutinneqarput ataatsimoorlutillu periarfissinneqassapput inuunermik kingumut qiviarnissaanut, maanna sumiinnermik eqqarsaatiginissaanut aamma meeqqamik siunissaa pillugu takorluukkamik ilimagisamillu misissornissaannut. MANU-mi siunertaavoq angajoqqaanngortussat tamarmik, angajoqqaarsiassat meeravissiartaartussallu, ilaqutariinni nutaamik meerartaqarlutik aallartilluarnissaat aamma angajoqqaat 0-6-inik ukiulinnik meerallit angajoqqaajunissaminnut sakkussanik peqarnissaat.
Angajoqqaajoriaatsit pitsaasut assigiinngissitaartorpassuupput
Illit namminerpiaq angajoqqaatut pissusilersuutissavit nassaarinissaanut ikiussavaatit.
”Paasiuminaatsippara upperiuminaatsillugulu. Ataatanngulerpunga, eqqumiik (…) Tassanngaannaq misigilerpunga sorpassuit isummerfigisariaqalerlugit. Ataatsikkut tanngassimaarpunga, imminut naammagisimaarlunga ernumallungalu”
