MANU sunaava?

MANU tassaavoq ataatsimoortumik isiginneriaaseqarluni najoqqutassiaq, angajoqqaanik malinnaaffiusoq, naartunermik misissuilluni atortumi titarnernit siullernit marlunniit 3-4- nik ukiulimmik meeraqarluni ulluinnarisaq ilanngullugu. Ataata anaanalu tamarmik isiginiarneqarput, ataatsimoorlutillu periarfissinneqassallutik namminneq inuunermik
qissiminnissaanut, maannakkorpiaq killiffigisamik eqqarsaatiginissaanut aamma meeqqamik siunissaa pillugu takorluukkamik ilimagisamillu misissornissaannut.

MANU tassaavoq meerartaaqqaartussanut imaluunniit meerartaartareersimasunut tamanut aamma angajoqqaanut, meeravissiartaartunut angajoqqaarsianullu sisamat tikillugit meeralinnut angusaqarluarniartumik, nalinginnaasumik nuna tamakkerlugu neqeroorut.

Ilinniartitsineq annermik eqimattakkaarluni ingerlanneqartarpoq, kisianni aamma illoqarfinni mikinerusuni nunaqarfinnilu aappariit kisermaalluunniit taakkuinnaatillugit ilinniartitsisoqarsinnaavoq.

MANU-mi atortussiat suliarineqarnikut tassaapput: Angajoqqaanik piareersaaneq, Meeraq 1-imiik 2-nut ukiulik, Meeraq 3-4-nik ukiulik, MANU Hash, MANU Imigassaq, MANU Angajoqqaanik ataatsimiisitsineq aamma MANU Innuttaasunik ataatsimiisitsineq.

 Najoqqutassiat makkunannga
immikkoortortaqarput:

  • Angajoqqaat atuagaat – kalaallisut qallunaatullu
  • MANU-mik ilinniartitsisunut ilinniartitsinissamik ilitsersuut
  • Angajoqqaanik ataatsimiisitsinermik ilinniartitsinissamut ilitsersuut
  • Innuttaasunik ataatsimiisitsinermik ilinniartitsinissamut ilitsersuut
  • Ilinniartitsinernut tamanut PowerPointit
  • Ilinniartitsinermi atortussat assigiinngitsut
  • Titartakkanik filmiliat ilinniartitsinermi atugassat
  • Titartakkanik filimiliaaqqat
  • Allagartat nivinngagassat
  • Postkortit
  • Meeqqanut atuakkat

MANU angajoqqaanngornissamut piareersarneq

Angajoqqaajunerup nuannersortaasa MANU-mi pingaartinneqarnerisa saniatigut naapeqatigiinnernut aammattaaq ilaapput, unamminartunut angajoqqaanngulernermi nalaanneqartartunut naleqqiullugu taperserneqarneq.
Assersuutigalugu anaanaq erninissi sapaatip-akunnerinik pingasunik sioqqullugu kisimiilluni aallartariaqarpat.

Angajoqqaat angajoqqaanngornissamut piareersarnermut peqataanerminnut ilutigitillugu, aallarnissap pineqartup ataatsimoorlutik piareersarnissaanut periarfissaqassapput. Avissaaqqanerup tamatuma tigussaasutigut misigissutsitigullu unammillernartuinut piareersarsinnaallutik.

MANU-mi ilinniartitsisut kommunineersuupput peqqinnissaqarfimmeersuullutillu, soorlu juumuut, meeqqerisut, perorsaasut imaluunniit psykologit. Ilinniartitsissut  tamarmik ilinniartitsillinnginnerminni pikkorissarneqassapput, ullut pingasut ingerlaneranni MANU-mik ilinniartitsinissaminnut piareersarneqassallutik. Ilaatigut ilinniartitsinikkut sunniiniutit assigiinngitsut misilerassavaat, akimmiffiusinnaasut misissorlugit, najoqqutassiallu immikkoortuinik assigiinngitsunik sungiusarneqarlutik.

MANU angajoqqaanngornissamut piareersarneq Namminersorlutik Oqartussanut peqqinnissaqarfimmillu suliarineqarpoq, kalaallit suliamut tunngasumik immikkut ilisimasallit qanimut suleqatigalugit.

MANU qanoq iliorlutit peqataaffigisinnaaviuk?
MANU-mut peqataaniarlutit nalunaarsinnaavutit, naartulerninni juumuumik
imaluunniit ernisussiornermi ikiortimik oqaloqatigineqarninnut siullermut atatillugu.

”Ulluliorneq” pillugu piviusut (Side 79 forældreforberedelse)
Tigussaasutigut piareersarnerup angerlarsimaffiit meeqqap inunngornissaanut piareersaannanngilaa. Aamma eqqarsartaatsikkut meeqqap inunngornissaanut piareersagaavutit. Meeqqap ataatsimoorlusilu ulluinnarisassasi eqqarsaatiginerujartornera ilutigalugu angajoqqaanngornissannut piareersimaneri annertusiartussaaq.