MANU imigassaq

Imigassaq aanngajaarniutaavoq atugaaqisoq. Kisianni imigassap
ajoqusiisarneranut malussarinnerpaat tassaapput meeqqat. Tamatumani
pineqarput meeqqat suli inunngoratik illissamiittut, aamma meeqqat ilaquttaminni qaniginerpaasaminni ajoqusiisumik imigassartorfiusumi peroriartortut.

Meeqqat pisariaqartippaat angajoqqaaminni, pisariaqartutigut isumassuinermik asanninnermillu tunniussisinnaasuni, toqqissisimasumik avatangiiseqarnissartik. Ajoraluartumik meerarpassuit ullumikkut pisariaqartitaraluaminnik toqqissisimallutik peroriartortanngillat. Misissuinerit nalunaarusiallu arlallit takutippaat, ajoqutaasumik imigassamik atuineq, meeqqat, inuusuttut ilaqutarillu ajornartorsiutaannut amerlaqisut pissutaasoq. Politiit nalunaarusiaasigut takuneqarsinnaavoq, imigassaq persutaanernik, ajutoornernik imminornernillu sulianut arlaleriaqaluni akuusartoq.

Angajoqqaanik ajoqutaasumik imigassamik atuisunik suleqateqassagaanni
pisariaqarpoq oqaloqatigiinnissaq, misigeqatiginnissinnaaneq isumassuinerlu.
Angajoqqaat taakku inuunerminni assigiinngitsorpassuarnik arlalitsigut
akiorniagassaqartarput. Angajoqqaanut pingaaruteqaqaaq, ajornartorsiutinut
naapittagaannut naleqqiullugu tapersersuinissarput. Angajoqqaat ilaqutariinni
nutaamik meerartaqalernerminni pitsaanerpaamik aallarteriarnissaminnut
periarfissaqartariaqarput.

MANU Imigassaq aqqutigalugu illit aallartilluarnissat aamma meeqqavit
angajoqqaajunerpillu aallartilluarnissaat periarfisserusuppagut.

Naartuninni imigassartorpit?
Naartuninni maannamut imigassartorsimaguit imerunnaavinnissat pingaaruteqarluinnarpoq.
Ilisimatusarnikkut uppernarsineqarnikuuvoq anaanaasup naartunermini imernera annertusiartortillugu meeqqamut ulorianassusia annertusiartortartoq.