Manu Hash

Peqqissuulluni inunngornissaq meeqqannut pingaarnerpaanut ilaavoq –
tamannattaaq ilinnut ilaquttannullu pingaaruteqarpoq.

Suut tamarmik celle-nit marlunnit katiguttunit pinngorput (mannissap celle-a
ataaseq anisuullu celle-a ataaseq). Naartulernermiit sapaatip-akunnerisa 12-it
siulliit ingerlaneranni uummat, qarasaq, isit, nissut – tassami meeraq tamarmi –
pinngortarput. Sapaatip-akunnerisa 12-it qaangiunerani meeraq tassaalersarpoq
inuk mikisoq. Maannamiit alliartuinnartussanngorpoq, illillu naapinnissannut
piareersarluni.

Haship meeraq suli inunngunngitsoq qanoq sunnertarpaa?

Hashimik pujortaruit meeraq illissamiittoq aamma akuutissanik hashimeersunik
sunnerneqassaaq. Annermik meeqqap qarasaa sunnigaasarpoq. Tamannalu
meeqqannik ajoqusiisinnaavoq. Assersuutigalugu meeqqap qarasaani
eqqaamannissinnaanermut, eqqarsarsinnaanermut, pilersaarusiorsinnaanermut
ataatsimoortumillu takunnissinnaanermut tunngasut – ataatsimullu isigalugu
qaratsamik atuisinnaaneq – ajoquserneqarsinnaapput. Meeqqap
illissamiinneraniinnaanngitsoq, inuuneratali sinnerani.

Ukiuni kingulliunerusuni hash sakkortusiartuinnarnikuuvoq, akuutissanillu
ulorianartunik suli amerlanernik akoqalernikuulluni. Taamaammat meeqqavit
paarilluarnissaa patsisissarpassuaqarpoq.

MANU Hash aqqutigalugu illit nammineq aallartilluarnissat aamma meeqqavit
angajoqqaajunerpillu pitsaanerpaamik aallartinnissaat periarfissikkumavagut.

Immaqa eqqarsarputit…
”Meerara paarilluarpara”

– Kisiannili hash-imik pujortaraangavit puigorsinnaallugu ulluinnarisavit
pilersaarusiornissaa, eqqarsaatikkut malinnaanissat imminullu paarinissat.