MANU 1-2 år

Ukioq ataaseq sinnerlugu angajoqqaajoreerputit, meeqqavillu tupinnaannavimmik inerikkiartornera takusareerpat. Meeqqap inunngoqqamminera eqqaamaviuk? Ilisinnut nassaariniartariqarnersi aamma naalungiarsuup qaqugukkut nerisarnissaanik sinittarnissaanillu paasiniaaqqaarnersi. Kingusinnerusukkullu meeqqat nammineq aalaniartalermat, assakaasalerluni ilinnullu qungujuttalerluni? Maanna pissutsit allarluinnaapput, meeqqat nammineq angalasinnaanngormat.

Inerikkiartortuarporlu.

Meeqqat assigiinngeqaat, aamma inerikkiartornerat taamaappoq. Ilaat
pisuliaartarput oqaluliaartarlutillu. Allat tamaasa arriinnerusumik ilikkariartortarpaat, imaluunniit oqaatsinik atuisaleriartornerat arrikkaluarluni pilertornerusumik pisuttalersinnaallutik. Meeqqat ilaat isummamikkut aalajangeriataartuusarput tunuaannarumasaratik, allallu qajassuarnerusarput tunuarsimaarnerullutillu. Nalinginnaalluinnarpoq meeqqat ukioqatigiit assigiinngitsorujussuusarnerat.

Tamanna qularnanngitsumik illit malugisimassavat. Meeqqat taama
assigiinngitsigisumik inerikkiartortarmata imminnut assersuunnissaat qaqutiguinnaq iluaqutaasarpoq.

Ilisimaviuk, meeqqat tamarmik mikinerminniit pinnguartartut. Pinnguarneq meeqqavit inerikkiartorneranut pingaaruteqarnerpaat ilagaat. Meeqqat pinnguartarput isumaqaramik pissanganartuusoq, alapernaatsuugamik avatangiisitillu paasiniarumagamikkit. Pinnguarneq pimoorussinerusinnaavoq, pissanganartuulluni,nuannersumik qiiaamminartuulluni nuannersuulluniluunniit, ilaannilu tamakku tamarmik ataatsikkoortinneqarsinnaallutik. Pinnguaatit suut meeqqavit maannakkorpiaq alutorivai? Meeraq peqatigalugu pinnguaatit suut pinnguarinissaat nuannarisarpigit?

Pitsaasumik angajoqqaariaatsit amerlaqaat!

Angajoqqaanik pikkorissaaneq

Meeqqavit qanoq pinissaanut aammattaaq apeqqutaavoq illit meeqqanut
meeqqallu peqatigalugu qanoq iliortarnersutit. Ataatsimoorlusi iliuuserisasi
tamarmik, aamma meeqqavit assersuutigalugu ilaquttassinnik ikinngutissinnillu qaninninerusunik qanoq peqateqartarnera meeqqap inerikkiartorneranut annertuumik pingaaruteqarput. Aamma pingaaruteqarput ilissi ilaquttassilu avatangiiserisasi – soorlu najukkassinni inuiaqatigiit – ineqarnersi – ilaqutariit inini ikittuinnarni amerlasuujunersusi, imaluunniit inunnut arlalinnut naammalluartunik inissaqarnersusi. Tamakku tamarmik akornuteqarani periarfissaqassutsimut pingaaruteqarput, assersuutigalugu meeqqavit pinnguarnissaminut periarfissaanut,
aamma meeqqanik inersimasunillu allanik peqateqartarnissaanut.

MANU meeraq ataatsimik marlunnillu ukiulik, angajoqqaanik
pikkorissartitsineruvoq, naartusunut angajoqqaanullu nukangasunik meeralinnut tamanut neqeroorutaasartoq. Pikkorissarneq aamma angajoqqaarsianut meeravissialinnullu saaffiginnippoq.

Pitsaasumik angajoqqaajoriaatsit amerlaqaaq, illillu periarfissaqarputit ilaqutariittut inuunerup illit nammineq ilaquttavillu toqqissisimanartitassi pilersinnissaanut. Angajoqqaanik pikkorissaaneq neqeroorutaavoq politikkikkoortumik annertuumik pingaartinneqartoq, tassami inuiaqatigiinnut politikkikkut meeqqat aamma ilaqutariit ingerlalluarnissaat peqqissuunissaallu tapersersorumaneqarluarput.

Ilisimaviuk, meeqqavit oqaatsitit tamatigut malissinnaasanngikkai. Assersuutigalugu pissanganartunik angusinnaasaminik misissuerusunnini aqutaralugulu naqisimasinnaanngilaa. Tamanna assersuutigalugu misigisinnaavat meeqqavit qulissaanik isarussatit seqinersiutit aallaruppagit, naak illit inussiarnersumik aalajangersimasumilli oqartarnikuugaluartutit taamaalioqqunagu.