Naartuit?

Meeqqavit ilaquttavillu pitsaasumik inuuneqarnissaat takorloorpiuk? Taamaappat MANU ilinnut naapertuulluassaaq! MANU tassaavoq angajoqqaanngornissamut piareersarneq, ilinnut ataatanngulersumut imaluunniit anaananngulersumut naatsorsuussaq. Apeqqutaanngilaq aatsaat meerartaalernersutit, tallimassaanik meerartaalernersutit, avannaani, kujataani, kangiani kitaaniluunniit najugaqarnersutit. MANU-mut peqataanikkut angajoqqaanngornissannut ingiaqateqassaatit. Sulisut pikkorissut meeqqat pillugit ilisimasallit naapissavatit.
Meeqqap ilumiuunermini inerikkiartornera aamma aappariinnermi qanoq pisoqartarnera pillugit ilisimasaqalissaatit. Meeqqavit inoorlaap qanimut attaviginissaa pillugu isumassarsitinneqassaatit. Aamma meeraaqqap inerikkiartortarnera pillugu iluaqutigisassannik allarpassuarnik ilisimasaqalissaatit.

Pikkorissarnerup ingerlanerani aammattaaq illit qanoq ataataanissat imaluunniit anaanaanissat kissaatiginerlugu eqqarsaatigilissavat. Aamma ataatsimoorlusi qanoq angajoqqaajorusunnerlusi aappallu oqaloqatigiinnissassinnut periarfissaqassaasi. Kisermaajuguit ilaquttavit ikinngutivilluunniit ilaat pikkorissaqatigisinnaavat. MANU-mi aammattaaq ilaqutariit allat angajoqqaanngortussat naapissavatit. Ataatsimoorlusi isumassarsianik misilittakkanillu paarlaasseqatigiissinnaavusi – naalungiarsuuteqarluni ulluinnarni inuunissinni atorsinnaasassannik.

Pitsaasumik angajoqqaariaatsit amerlaqqat!

MANU-p illit nammineq angajoqqaatut periusissavit nassaarinissaanut ikiussavaatit. 

Ilisimaviuk, naalungiarsuit inunngornerminniit tassaapput inuit nammineerisaminnuk inuttut pissusillit. Namminneq sukkassusertik periusertillu malillugit inerikkiartortarput. Meeraaqqat assigiissuteqartaqaat – taamatulli aamma assigiinngissuteqartigalutik!